«Орозо кармоочунун оозунан чыккан жагымсыз жыт, Аллах Тааланын астында жыпар жыттуу атырдан да жагымдуу болот. Кыямат күнү ага эсепсиз сооптор берилет» (хадис).
Кыргызстан мусулмандарынын Дин башкармалыгы билдирет:
Садака-фитирди берүү белгиленген өлчөмдө ар бир колунда бар (нисаб өлчөмүнө ээ) мусулман үчүн важиб болуп саналат. Азирети Умар (р.а.) риваят кылган хадисте Пайгамбарыбыз Мухаммад (с.а.в.): «Садака-фитирди чоң-кичине, аял-эркек экендигине карабастан ар бир жан үчүн берүү керек», деп бекиткен.
КМДБ 2026-жыл (хижрий 1447-жыл) үчүн садака-фитирдин төмөнкүдөй өлчөмдөрүн жана тартибин бекитти:
1. Садака-фитир ар бир жан башына буудай, ун жана мейизден 1 кг 600 грамм, ал эми арпа жана курмадан 3 кг 200 грамм же алардын акчалай баасынын өлчөмүндө берилет. Жергиликтүү базарлардагы баалардын негизинде, садака-фитирдин баасы төмөнкүдөй бекитилди:
| Азыктын түрү | Өлчөмү | Баасы (орточо) | Жалпы (садака-фитирдин баасы) |
| Буудай | 1,6 кг | 37,5 сом | 60 сом |
| Ун | 1,6 кг | 56,25 сом | 90 сом |
| Мейиз | 1,6 кг | 550 сом | 880 сом |
| Арпа | 3,2 кг | 31,25 сом | 100 сом |
| Курма | 3,2 кг | 375 сом | 1200 сом |
2. Садака-фитир берүүчү адам жогоруда көрсөтүлгөн баалардын кайсынысынан чыгарса, өз ыктыяры. Бей-бечара муктаждардын пайдасы үчүн баасы кымбатыраак азыктардан чыгаруусу абзел.
Эскертүү: Баалардын туруксуздугуна байланыштуу, садака-фитирди берген учурда буудай, ун жана мейиздин 1,6 кг, ал эми арпа жана курманын 3,2 кг баасына көңүл бурууңуздарды эскертебиз.
