«Орозо кармоочунун оозунан чыккан жагымсыз жыт, Аллах Тааланын астында жыпар жыттуу атырдан да жагымдуу болот. Кыямат күнү ага эсепсиз сооптор берилет» (хадис).
Кыргызстан мусулмандарынын Азирети Муфтийи Абдулазиз кары Закировдун тапшырмасына ылайык, Талас облусунда имамдардын квалификациясын жогорулатуу боюнча иштелип чыккан программанын алкагында окуу сабагы өткөрүлдү.
Иш-чара КМДБнын Талас облусундагы өкүлчүлүгүндө өтүп, аны КМДБ тарабынан түзүлгөн атайын кары устаздар өткөрүштү. Атап айтсак, КМДБнын өкүлчүлүктөр, хатибияттар, мечиттер, имамдар менен иштөө жана курулуш бөлүмүнүн адиси Муратали Мамадияр уулу; Бишкек шаарындагы башкы «Имам Сарахси» мечитинин имам-хатиби Абдулла Акбарали уулу; Бишкек шаарынын Куран академиясынын мүдүрү Насрулло Искандаров жана Ибрахим Балтабаев карылар лекция окушту.
Окууну КМДБнын Талас облусундагы өкүлүнүн орун басарынын м.а. Рысбек Кокумов ачып, 4 райондун баш имам-хатибдери, медресе мүдүрлөрү, ошондой эле айыл өкмөттөрдүн жооптуу имамдары катышуусунда уланды.
Жыйында муфтият тарабынан бардык мечит имамдарынын билимин системалуу жогорулатууга багытталган программа кеңири тааныштырылды. Программанын негизги максаты төмөнкүлөрдү камтыйт:
Курани Каримди тажвид эрежелерине ылайык туура окутуу;
Азанды так жана кооз айтууну үйрөтүү;
Имамдардын практикалык чеберчилигин жогорулатуу;
Куран конкурстарын уюштуруу тартиптери;
Коомго таасирдүү жана жоопкерчиликтүү дин кызматчыларын даярдоо.
Иш-чарада облус аймагындагы бардык имамдар бул программага сөзсүз катышуусу керектиги баса белгиленип, тиешелүү нускамалар берилди. Иш-мерчемге ылайык, долбоордун биринчи этабы эки айлык окутуу мезгилин камтыйт. Окутуунун жыйынтыгында дин кызматкерлери Куран жана тажвид эрежелери боюнча сынак тапшырышат.
Муфтият бул иш-чара өлкө аймагындагы имамдардын дин жаатындагы билим деңгээлин жогорулатууга багытталганын белгилейт.
