Тоң райондук билим берүү башкармалыгында «Экстремизм, терроризм жана суицидге жол жок» аталышындагы иш чара өтүп, ага РИИБ кызматкерлери, Төрт-Күл айылынын имамдары жана билим берүү башкармалыгынын жетекчиси Нурия Өндүрүшова катышты. Иш чара алкагында жергиликтүү бийлик өкүлдөрү менен дин кызматкерлери мектептердеги талап-тоноочулук, терс диний агымдардын алдын алуу, өз өмүрүнө кол салууну токтотуу максатында биргеликте иш алып барууну пландашты.
“Ушундай эле түшүндүрүү иш чарасы Кажи-Сай айылында өтүп, жергиликтүү тургундарга терс диний агымдар боюнча түшүндүрүү иштери жүргүзүлдү. Муну менен катар балдардын тарбиясына көңүл буруп, билим берүү керек экендигин айттык”,-деди Тоңдун баш имам хатиби Таалайбек ажы Акунов.
