Ассаламу алейкум ва рахматуллахи ва баракатуху

Урматтуу мекендештерим! 

Бүгүнкү күн ар бирибиз үчүн өзгөчө ыйык жана улуу маани-маңызга ээ. Кыргыз Республикасынын Эгемендүүлүк күнү – ата-бабабыздын каны-жаны менен келген ыйык эркиндиктин, ынтымак менен биримдиктин, Мекенге болгон чексиз сүйүүнүн күнү. Бул күн – ата-бабалардын мурасын урматтап, келечек муундарга татыктуу мамлекет калтыруу жоопкерчилигин эске салган күн.

Ислам дини адамзатты ынтымакка, боорукерликке, адилеттүүлүккө жана Мекенди сүйүүгө үндөйт. Эгемендүүлүк – Жараткан Алланын бизге берген улуу белеги. Аны баалап, шүгүр кылып, элибиздин тынчтыгын жана өлкөбүздүн бүтүндүгүн сактоо – ар бирибиздин ыйык парзыбыз.

Урматтуу бир туугандарым!  Биздин күчүбүз бөлүнүүдө эмес, биримдикте. Уруу, аймак, тил, дин, көз караш деп бөлүнбөй, бир үй-бүлөдөй ынтымакта жашоо – улутубуздун улуулугунун белгиси. Үй-бүлө институтун бекемдеп, ата-энеге урмат, балага мээрим көрсөтүү – коомдун ырааттуу өнүгүшүнүн негизи болуп саналат.

Ошондой эле өлкөбүздүн жетекчилигин сыйлоо, мамлекетибиздин өнүгүүсүнө салым кошуу – мусулман коомчулугунун да милдети. Ыйман менен патриоттуулукту айкалыштырып, адал эмгек менен токчулукка жана молчулукка жетишүү – элибиздин бакубат жашоосунун кепилдиги.

Алла Таала Кыргызстаныбызга тынчтык, эли-журтубузга береке, жашообузга ырыскы жана кут дарытсын! Жараткан эгемендүүлүгүбүздү түбөлүк кылып, өлкөбүздү өнүгүп-өсүп жаткан мамлекеттердин катарына кошсун!

Эгемендүүлүк күнүңүздөр кут болсун, урматтуу мекендештерим!

Сиздерди урматтоо менен, 

Азирети Муфтий Абдулазиз кары Закиров