Бүгүн, 23-ноябрь күнү КМДБ тарабынан умрага жолдомо берилген 60 дин кызматкери Манас эл аралык аэропортунан САПтын Жидда шаарына учуп кетти.

Муфтияттын тарыхында алгачкы жолу ондогон дин кызматкерин умрага жөнөтүү саамалыгына Азирети Муфтий өзү катышып, зыяратчыларга ак батасын берди.

«Берешен демөөрчүлөрүбүздүн колдоосу менен 60 кызматкерибиз умрага аттануу алдында турасыздар. Алла Таала ак жол берип, сак-саламат барып келиңиздер. Жаштар улууларга кызмат кылып, ибадатты жакшы өтөңүздөр. Биздин атыбыздан пайгамбарга салам айта барыңыздар. Эли-журтубуз, өлкөбүз үчүн көп-көп дуба кылышыңыздарды өтүнөмүн», – деди Азирети Муфтий зыяратчыларды узатуу саамалыгында.

Айта кетсек, Азирети Муфтий Абдулазиз кары Закировдун демилгеси менен Муфтияттын түзүмүндөгү 60 расмий дин кызматкери умрага аттанып жатат. Алардын катарында КМДБ кызматкерлери, казыят адистери, райондордун баш имам-хатибдери жана элет имамдары бар.