Мээримдүү жана ырайымдуу Алланын ысымы менен

1. Исламда үй-бүлөнүн орду

Ислам дини үй-бүлөнү ыйык нерсе катары көрөт. Үй-бүлө — бул коомдун пайдубалы, тарбиянын очогу жана ырахаттын булагы. Ошондуктан, ажырашуу (талак) — акыркы чара катары гана уруксат берилген, бирок Аллах Таалага эң жек көрүндү болгон адал иш деп айтылган. "Талак" — бул нике келишимин бузуу, башкача айтканда эркектин өз аялына ажырашуу максатта ажырашууга тиешелүү сөздөрдү айтуу аркылуу никени токтотуу иши. Ислам шариятында талак — эркектин колундагы укук, бирок бул укукту адилет, жоопкерчиликтүү жана акыркы чара катары гана колдонуу талап кылынат.
Алла Таала айтты: “А эгер жубайлар ажырашса, анда Алла өзүнүн жоомарттыгы менен алардын ар биринин ырысын бере берет. Акыйкатта Алла Ырайымдуу, Даанышман!” (Ан-Ниса, 130-аят)

Пайгамбарыбыз ﷺ айтты: “Алла Таалага эң жек көрүндү болгон халал иш — бул талак.” (Абу Дауд, 2178)

2. Талактын мааниси жана шарияттагы орду
- Талак — халал, бирок Алла Таалага эң жек көрүндү болгон халал иш.
Талак — үй-бүлөнү сактап калуу мүмкүн болбой калган учурда гана -колдонулуучу акыркы чара.
- Талак аркылуу аял менен эрдин никелик укуктары токтойт.
- Бирок талактан кийин да айрым шарияттык милдеттер (мисалы, идда мөөнөтү, нафаке, балдардын камкордугу ж.б.) сакталат.

3.  Эмне үчүн ажырашуу жакшылык алып келбейт?
- Балдарга психологиялык зыян – ата-эненин ажырашы балдардын руханий дүйнөсүнө чоң жараат калтырат.
- Коомдук туруктуулукка зыяны бар – ажырашкан үй-бүлөлөрдүн көбөйүшү коомдун бекемдигин начарлатат.
- Руханий жана моралдык жоготуу – нике Аллахтын ысымы менен түзүлгөн келишим, аны бузуу жеңил чечим эмес.
- Пайгамбарыбыз ﷺ сабырдуулукту кеңеш кылган – үй-бүлөлүк чатактарда сабыр кылуу жана акыл менен чечүү мактоого татыктуу иш.

4. Ажырашуу болбой калышы үчүн эмне кылуу керек?
- Өз ара сүйлөшүү жана кечиримдүүлүк.
- Үй-бүлөлүк кеңеш же үчүнчү тараптын ортомчулугу.
- Динге кайрылуу, дуба кылуу жана терең ойлонуу.
- Ата-энелердин жана улуулардын акыл-насааты.
- Аял менен эрдин укуктарын жана милдеттерин билүү.

5. Жыйынтык
Талак — бул жөн гана “ажырашуу” эмес, бул Аллахтын алдында жоопкерчиликтүү чечим. Исламда негизги максат — талакка жеткирбей, түшүнүшүү, сабыр жана кечирим аркылуу үй-бүлөнү сактап калуу. Ажырашуу — шариятта уруксат берилген, бирок жагымсыз иш. Ал акыркы чара болууга тийиш. 
Алла Таала ар бир үй-бүлөгө тынчтык, түшүнүшүү жана сүйүү берсин.
Пайгамбарыбыз ﷺ айткан: “Эң жакшыңар — өз үй-бүлөсүнө эң жакшы мамиле кылгандар”.

Калкты диний маалыматтар менен камсыздоо (фатва) бөлүмү

(Башкы бетте колдонулган сүрөт интернет булактарынан алынды)