«Орозо кармоочунун оозунан чыккан жагымсыз жыт, Аллах Тааланын астында жыпар жыттуу атырдан да жагымдуу болот. Кыямат күнү ага эсепсиз сооптор берилет» (хадис).
Ыйык Рамазан айына карата Ноокен райондук хатибияты Ноокен РИИБ боюнча ЖКК бөлүмүнүн кызматкерлери менен биргеликте “Ылдамдыкты сактаңыз, белгиленген чектен ашпаңыз!” аттуу акция уюштурду.
Иш-чаранын алкагында дин кызматкерлери жана жол кыймылынын коопсуздугун көзөмөлдөө кызматкерлери айдоочуларды токтотуп, ооз ачарга суу жана курма таратышты. Ошондой эле жол коопсуздугу боюнча эскертме баракчалар берилди.
Райондун баш имам-хатибинин м.а. Тынчтыкбек ажы Шаиков белгилегендей, акциянын максаты — айдоочуларга адам өмүрү аманат экенин эскертип, жол эрежелерин так сактоого чакыруу.
Айта кетсек, КМДБ жана анын түзүмдөрү тарабынан «Адам жаны – аманат» аттуу акция салттуу түрдө өткөрлүп келет. Анын алкагында айдоочуларга жол эрежелерин сактоо жана жолдо шашпоо эскертилип, ооз ачар баштыкчалары таратылат.
