Кыргызстан мусулмандарынын Аалымдар Кеңешинин төрагасы Замир кары Ракиев ажылык мезгилинин жакындап калгандыгына байланыштуу ажылык сапарын туура жана шарият көрсөтмөлөрүнө ылайык аткаруу боюнча кеңири сабак өттү.

Замир кары Ракиев ажылык – бул жөн гана саякат эмес, Аллах Таала буйруган ыйык парз экендигин белгилеп, аны ар бир мусулмандын жүрөгү менен түшүнүп, чоң жоопкерчилик менен өтөөсү зарыл экенин эскертип өттү.

“Ажылык – таалим жана тарбия мектеби. Ар бир кадам, ар бир амал өз ордунда, ниет менен, адеп менен жана шариатка ылайык болушу керек,” – деди ал өз сөзүндө.

Сабак учурунда төмөнкү негизги темалар кеңири түшүндүрүлдү:

Ажылыктын парздары жана важиб амалдары;

Ихрамга кирүүдөгү талаптар жана жаңылыштыктар;

Таваф, Са’й жана Арафаттагы туруу тартиби;

Ажылыктагы руханий мааниси жана сабырдуулуктун ролу;

Зыярат маданияты жана ажылыктын тартибин бузбоо эрежелери.

Аалымдар Кеңешинин төрагасы ажылыкты уюштуруудагы тартипке да токтолуп, сапар учурунда биримдик, тазалык жана бири-бирине карата урмат-сый сактоо ажылыктын мазмунуна дал келерин баса белгиледи.