Анас ибн Малик (р.а.) мындай риваят кылат: “Аллахтын Элчиси Пайгамбарыбызﷺ Меккеден Мадинага хижрат кылып келгенде, Мадина элинин майрамдай турган эки күнү бар эле. Аллахтын Элчисиﷺ: “Бул эмне болгон күн?” – деп сураганда, алар: “Жахилият доорунда ушул эки күндү майрамдачу элек”, – деп жооп беришет. Ошондо Аллахтын Элчисиﷺ: “Бул эки күндү (таштагыла). Аллах силерге андан да жакшы болгон Курман айт менен Орозо айтты майрам кылып берди” – деди”. Абу Дауд:1134
Кыргызстан мусулмандарынын Азирети Муфтийинин Ош облусундагы өкүлү Султанали ажы Гапуровдун демилгеси менен Орозо айт майрамын утурлай, 100 жетим балага жана 100 муктаж үй-бүлөгө жардам баштыктары таратылды.
100 жарым жетим жана тоголок жетим балдарга кийим-кечелер таратылган болсо, 100 муктаж үй-бүлөгө тамак-аш азык-түлүктөрү таратылды.
«Мусулман коомчулугунда эң эле шаан-шөкөт менен өтүүчү Орозо айт майрамын утурлай ата-энесинен эрте ажыраган 100 балага кийим-кече тапшырып, көңүлүн көтөрүүгө аракет кылдык. Ошондой эле, аз камсыз болгон 100 муктаж үй-бүлөгө да тамак-аш азык-түлүктөрү таратылды. Бул да болсо, Рамазандын берекеси менен ишке ашууда десек болот. Биздин демилгени колдоп келген «Эмират» кайрымдуулук фондуна ыраазычылык билдиребиз, – деди Султанали ажы Гапуров.
