Бүгүн, 19-август күнү Чүй облусунун Токмок шаарындагы Ислам Академиясында КМДБнын "Диним-Ислам, Өлкөм-Кыргызстан", "Муфтият кечээ, бүгүн жана эртең" аттуу көчмө жыйыны өткөрүлдү.

Аталган иш-чарага Кыргызстан мусулмандарынын Азирети Муфтийинин орун басары Рафаил ажы Татиков, Кыргыз Республикасынын Президентинин Чүй облусундагы ыйгарым укуктуу өкүлү Элкинбек Аширбаев, КР Президентине караштуу Дин иштери жана этностор аралык мамилелер боюнча улуттук агенттигинин төрагасынын орун басары Айбек Иминов, Азирети Муфтийдин аймактагы жалпы өкүлдөрү, Чүй облусу боюнча жалпы райондук баш имам-хатибдер жергиликтүү бийлик өкүлдөрү катышты.

Жыйын алгач Кыргыз Республикасынын Мамлекеттик Гимни менен башталып, андан соң ыйык Куран аяттары окулду. Андан соң иш-чаранын катышуучуларына сөз берилди.

Анда Азирети Муфтийдин орун басары Рафаил ажы Татиков Азирети Муфтий Абдулазиз кары Закировдун 2024–2029-жылдарга карата 40 кадамдан турган стратегиялык планы тууралуу кеңири маалымат берди.

Жыйында 40 кадамдан турган 5 жылдык планды ишке ашыруу механизмдери аныкталып, жооптуулар бекилип, аны жүзөгө ашыруу ырааттуу жүргүзүлүп жаткандыгы, КМДБнын тарыхында алгачкы, комплекстүү жана 5 жылдык мөөнөттү кучагына алган стратегиялык иш-мерчем Азирети Муфтийдин жеке көзөмөлүндө ишке ашып жаткандыгы белгиленди. 

Иш-чаранын алкагында КМДБнын 40 кадам иш-планынын алкагында аткарылган иштери жана КМДБнын Бишкек шаарындагы өкүлчүлүгүнүн ишмердүүлүгү тууралуу видео материалдар коюлду. Ошондой эле, тарбиялык маанидеги эки видео ролик катышуучуларга көрсөтүлдү. 

Жыйындын аягында Азирети Муфтийдин Чүй облусундагы өкүлү Сулумбек ажы Узеналиевге КМДБнын ордени тапшырылды. Ошондой эле жыйындын катышуучуларына КР Президентинин Чүй облусундагы ыйгарым укуктуу өкүлүнүн жана Азирети Муфтийдин Ардак грамоталары менен ыраазычылык баракчалары тапшырылды.