“Кимде-ким (Аллага) чындап ишенип, Алладан жакшылык күтүп, Рамазанда орозо кармаса, анын ага чейинки күнөөлөрү кечирилет” (хадис).
Кечээ, 18-февралда Каракол шаарында Кыргызстан мусулмандарынын Дин башкармалыгынын Ысык-Көл облусундагы өкүлчүлүгү менен биргеликте эки кайрымдуулук иш-чарасы уюштурулду.
Биринчи иш-чара «Хусейин Карасаев» атындагы түрк лицейинин бүтүрүүчүлөрү тарабынан өткөрүлүп, 120 муктаж үй-бүлөгө жардам көрсөтүлдү. Лицейдин бүтүрүүчүлөрү аз камсыз болгон, муктаж жана мүмкүнчүлүгү чектелген жарандарга орозо айынын урматына жакшылык кылууну максат кылышканын билдиришти.
Экинчи кайрымдуулук иш-чарасы араб мамлекетинин жараны Шейх Солих аль-Мазияддын колдоосу менен өткөрүлдү. Ал жыл сайын муктаж үй-бүлөлөргө жардам көрсөтүп келет. Бул жолу да КМДБнын Ысык-Көл облусундагы өкүлчүлүгү менен биргеликте 50 муктаж үй-бүлөгө азык-түлүк таратып, жергиликтүү эл менен жолугушту.
