Бүгүн, 14-июнь күнү Кыргызстан мусулмандарынын Азирети муфтийи Абдулазиз кары Закиров Ош облусуна жасаган иш сапарынын алкагында Кара-Суу районуна караштуу Жаңы-Арык айылындагы реконструкциялоодон өткөн «Азатбек ажы» мечитинин ачылыш аземине катышып, келген конокторду жана жергиликтүү тургундарды Курман айт майрамы менен куттуктап, жума баянында курмандык чалуу темасында баяндама жасады.

Мечит реконструкция болгонго чейин 350 адамга гана ылайыктуу болгон болсо, бүгүн сыйымдуулугу 1000 адамга жеткен заманбап мечитке айланды. «Азатбек ажы» мечити Ош-Бишкек жолунун боюнда жайгашкан. Бул болсо, жергиликтүүлөрдөн сырткары, жүргүнчулөр үчүн да ыңгайлуулук жаратат. Мечиттин бир бөлүгүндө аялдар үчүн каралган намазкана да жайгашкан. Курулуш иштери толугу менен Равшан Сабиров тарабынан каржыланган.

Саамалыкка Кыргыз Республикасынын Улуттук коопсуздук мамлекеттик комитетинин төрагасы Камчыбек Ташиев, Азирети муфтий Абдулазиз кары Закиров, Ош облусунун мусулмандарынын казысы Абибилла ажы Кадырбердиев, дин кызматкерлери жана жергиликтүү тургундар катышты.

Иш-чаранын соңунда «Анаркан ажы эне» ислам окуу борборунун курулушуна капсула салуу жөрөлгөсү аткарылып, мамлекет, эл үчүн бата кылынды.