Ош шаарында “Умму Мухаммад” медресесинин жыйындар залында шаардагы диний окуу жайлардын мүдүрлөрү, окуу бөлүм башчылары, кураторлор жана документ менен иштеген адистер үчүн семинар-тренинг өткөрүлүп, анын алкагында окуу системасын жаңы нукка өзгөртүү жана электрондоштуруу маселеси каралды.

Иш-чарада мугалимдерге куратордук отчёт, окуу план жана окуу программалар, календардык план менен иштөө, баалоонун, баа коюнун нормативдери-упай, модулдук система жана педагогика, методика боюнча усулдук иштелмелер боюнча кеңири маалыматтар берилди.

КМДБнын Диний билим берүү бөлүмүнүн башчысы Абдиназар Хаджибеков: «Диний окуу жайлардын мүдүрлөрү жана окутуучулар үчүн уюштурулган методикалык семинар-тренинг өз максатына жетип, талкууга жана практика жүзүндө иш кагаздар менен иштөөдө мугалимдер активдүү катышты. Аларды кызыктырган суроолорго жооптор берилди», – деди өз сөзүндө.

Эске салсак, аталган методикалык семинар-тренинг Кыргызстан мусулмандарынын Азирети Муфтийи Абдулазиз кары Закировдун демилгеси жана буйругунун негизинде аймактарда уюштурулуп жатат.