Нарын облусундагы Ак-Талаа районунун Ала-Буга айыл аймагына караштуу Конорчок айылынын имамы Жаныбек Мамытбеков 16 жылдан бери үзүрлүү эмгек кылып, жергиликтүү элге кызмат көрсөтүп келет. Анын эл үчүн кылган талыкпаган иш-аракетин баалаган айыл тургундары имамга «Subaru» үлгүсүндөгү автоунааны жана ыйык жерге зыярат кылуу үчүн умра жолдомосун белек кылышты.
Белектерди тапшыруу аземи жогорку деңгээлде өтүп, тургундар имамга куттуктоо сөздөрүн айтып, анын буга чейинки эмгектери үчүн ыраазычылыктарын билдиришти. Ошондой эле Жаныбек Мамытбековго мындан ары да жакшы иштерди алып барып, эл үчүн кызмат кылууну каалашты.
Саамалыкка Ак-Талаа районунун баш имам-хатиби Каныбек Айбек уулу жана айыл тургундары катышып, имамдын эмгегине алкыш айтышып, анын мындан аркы ишине ийгилик каалашты.