Жалал-Абад облусунун мусулмандар казыяты мамлекеттик тилдин кадыр-баркын көтөрүү, имам-хатибдердин эл алдында сүйлөө чеберчилигин өнүктүрүү жана алардын билим деңгээлин жогорулатуу максатында “Мыкты хатиб” сынагын жарыялады.
Сынак 2025-жылдын аягына чейин уланат жана имам-хатибдер негизги үч критерий боюнча бааланат:
- Эркин темада баян жасоо – катышуучулар мамлекеттик тилде өздөрү тандаган темада баяндама жасашы керек.
- Убакыт чеги – баян 15 мүнөттөн ашпоого тийиш.
- Кийим – имам-хатибдердин формасы иреттүү болушу шарт.
Ошондой эле, тандап алган темадан чыкпай, так жана мазмундуу баян кылган катышуучуларга артыкчылык берилет.
Сынактын биринчи этабы 2025-жылдын 10-февралында Жалал-Абад шаарындагы Мусталый уулу Нуркожо ажы атындагы Ислам маданий борборунда өтөт. Бул айлампага Жалал-Абад шаарындагы 22 жума мечитинин имам-хатибдери катышып, өздөрүнүн билим деңгээлин жана баяндама жасоо жөндөмүн сынап көрүшөт.