Бишкек шаарынын казысы Шакир ажы Маматов борбор калаанын жалпы имамдары менен жыйын өткөрүп, Ыйык Рамазан айынын алдында аткарыла турган маанилүү иштер боюнча кеңешме өткөрдү.

Жыйында ханафий мазхабынын негиздерин жамаатка кеңири түшүндүрүү, мечиттерде коопсуздукту камсыз кылуу жана ибадат үйлөрүнүн тазалыгын сактоо боюнча маселелер талкууланды.

«Урматтуу борбор калаабыздын имамдары! Ар бириңиздерге аманат катары жүктөлгөн мечиттер – бул Аллах Тааланын үйү, мусулмандардын ыйык ибадат кылуучу жайы. Аманатка кыянаттык кылбоо – ар бир момундун милдети. Андыктан ар бир мечитте жарандарыбызга ибадат кылууга эң жакшы шарттарды түзүп берүү – сиздердин парзыңыздар. Астыбызда келе жаткан Ыйык Рамазан айы – ырайым, берекет жана кечирим айы. Бул касиеттүү айда мечиттердин тазалыгына, жамааттын коопсуздугуна өзгөчө көңүл бурууңуздар абзел. Ибадаттар ханафий мазхабынын негизинде аткарылып, шарияттын талаптарына толук жооп бериши керек. Ар бириңиздерден бул маселеге олуттуу мамиле кылууңуздарды талап кылам. Рамазан айы – жүрөктөрдү тазалап, ниеттерди оңдоо мезгили. Жамаат үчүн эң жакшы шарттарды түзүп берүү сиздердин да соопторуңузду арттырат», – деп баса белгиледи шаар казысы.

Ошондой эле казыят тарабынан атайын жумушчу топ түзүлүп, борбор калаадагы бардык мечиттердин абалы текшерүүгө алына турганын маалымдады. Бул иш-чаранын максаты – ибадат жайларынын шарият эрежелерине шайкештигин камсыз кылып, мусулмандардын жакшы шарттарда ибадат кылуусун колдоо.

Жыйындын соңунда айрым имамдарга белгиленген талаптарды аткарууда кемчиликтер кеткендиги үчүн эскертүүлөр берилди.

Бул жыйын – ыйык парз болгон ибадаттарды таза жүрөк, туура ниет жана бекем тартип менен аткаруу үчүн жасалган маанилүү кадам. Ар бир имам өзүнө тапшырылган милдетти так аткарып, мусулмандардын ибадат кылуусуна мыкты шарт түзүүгө аракет кылуусу – бул улуу сооп жана аманатка болгон берилгендиктин белгиси.