2025-жылдын 24-25-февралында Кыргызстан мусулмандарынын Азирети Муфтийи Абдилазиз кары Закиров Түрк Мамлекеттер Уюмуна (ТМУ) мүчө өлкөлөрдүн Диний Башкармалыктарынын алдындагы Фатва Кеңешинин кезектеги жыйынына катышуу үчүн Стамбул шаарына барды. Бул жыйынга Кыргызстан мусулмандарынын Дин Башкармалыгынын фатва бөлүмүнүн башчысы Жоробай ажы Шергазиев, Ош облусунун казысы Абибилла ажы Кадырбердиев жана КМДБнын ТМУдагы өкүлү Акылбек Халбековдор катышууда.
Фатва Кеңешинин бетме-бет форматтагы жыйынында бир катар диний жана шарияттык маселелер талкууланды. Белгилей кетсек, ТМУга мүчө өлкөлөрдүн Азирети Муфтийлеринин 2023-2024-жылдары Ташкент жана Астана шаарларында өткөн жыйындарында Фатва Кеңешинин жобосу кабыл алынган. Бул жолку жыйында да учурдагы маанилүү маселелер боюнча пикир алмашуу улантылды.
Мындан сырткары, Азирети Муфтий Абдилазиз кары Закиров Түрк Мамлекеттер Уюмунун Башкы Катчысы Кубанычбек Өмүралиев менен жолугушуп, мүчө өлкөлөрдүн диний башкармалыктарынын ортосундагы кызматташтыкты жана биримдикти чыңдоо маселелерин талкуулады. Ошондой эле 2025-жылдын 10-12-сентябрь күндөрү Бишкек шаарында өтө турган Азирети Муфтийлердин жыйынына карата даярдык маселелери боюнча пикир алышуу жүргүзүлдү.
Бул жыйын дин башкармалыктар ортосундагы кызматташтыкты бекемдөөгө жана ТМУга мүчө өлкөлөр ортосундагы тажрыйба алмашууга салым кошмокчу.
