Бүгүн, 26-февраль күнү Ош облусуна караштуу Өзгөн районунун баш имам-хатиби Үсөн Маматтурсун уулу ОшМУнун Өзгөн эл аралык медициналык колледжинин студенттери менен жолугушуп, суициддин алдын алуу, рекетчиликтин жаман кесепеттери боюнча профилактикалык жыйында өз баяндамасын жасады.
«Көйгөйлөрдү акыл менен чечүүгө аракеттенүү керек. Бул жаатта студент катары силердин дүйнө таанымыңар кеңири болгондуктан, башкаларга үлгү болууңар керек. Ал үчүн көп китеп, жакшы жүрүм-турум менен Мекен жана ата-эне алдындагы жоопкерчиликти сезе билүү керек. Баарыңыздарга маалым болгондой, динибизде да адамдын өмүрү аманат экени айтылат. Жараткан берген жанды Жараткан өзү гана алышы керек. Өз өмүрүнө кыюу, башканын өмүрүн кыйгандай эле чоң күнөөлөрдөн. Ошол эле учурда өз жанына кол салуу – бул социалдык жоопкерчиликтен, Кудайдын бизге жүктөгөн негизги миссиясынан качуу болуп саналат», – деди баш имам-хатиб Үсөн Маматтурсун уулу.
Аталган жыйынга райондук баш имам-хатибдин орун басары Жусупбек Арстанбек уулу, милиция кызматкерлери, окуу жай мугалимдери жана студенттери катышты.