Буга чейин КМДБ тарабынан чет мамлекеттерде боло турган дүйнөлүк, эл аралык Куран жарыштарда өлкөбүздүн атынан катышуу үчүн мыкты карыларды тандоо сынагы жарыяланган болчу. Ага ылайык, тандоо сынагы жалпы 3 этап менен өткөрүлүп, 3-этабы кечээ, 26-февраль күнү жыйынтыкталды.

Жарыя боюнча сынакка катышууну каалагандар үчүн катталуу 10-февралда аяктаган. 10-февралга карата катталган карылардын саны 30 ашкан. Сынактын 1-туру видеоролик аркылуу тандалып, 2-турга 21 кары жолдомо алышкан. Жарыштын 2-туру 14-февраль күнү Zoom платоформасы аркылуу онлайн форматта өтүп, 12 каары 3-турга жолдомо алган.

Сынактын жыйынтыктоочу туру кечээ, 26-февралда КМДБнын жыйындар залында офлайн форматта өткөрүлдү. Комиссиянын жыйынтыгы боюнча 9 кары 90%дан жогорку баллга ээ болсо, 2 кары 80% жогорку балл алышты.

Эми комиссиянын жыйынтыгы боюнча жогорку балл алган карылар Кыргызстандын атынан чет өлкөдө боло турган Куран жарыштарына жиберилмекчи. Айта кетсек, аталган саамалык Азирети Муфтийдин эл аралык жана дүйнөлүк Куран жарыштарына мыкты карыларды тандап алып жөнөтүү боюнча берилген тапшырмасына ылайык уюштурулду.