Кечээ, 28-февраль күнү КР президентинин Ош облусундагы ыйгарым укуктуу өкүлү Эльчибек Джантаевдин төрагалыгында координациялык кеңештин жыйыны болуп, ага Ош облустук казыятынын үгүт-насаат жана мечиттер адиси Мухаммадсали ажы Рахмидинов да катышып, күн тартибинде каралган маселе боюнча сөзгө чыгып, облус аймагында экстремизмдин, терроризмдин жана жаш өспүрүмдөр арасындагы кылмыштуулуктун алдын алуу боюнча аткарылып жаткан иштер жөнүндө билдирүү жасады.

«Ош облустук казыяты эл менен тыгыз иштешүүгө, түшүндүрүү иштерин жүргүзүүдө дайыма кызматташууга даяр. Айта турган болсок, өткөн жылы райондордо эл менен жолугушууларды уюштуруп, бир топ маселелерди элге жеткирүүгө аракет болгон. Бул жылы да райондук хатибияттар аркылуу айыл өкмөттөрдө эл менен жолугушууларды уюштуруу пландалып жатат. Учурда облус аймагында миңден ашуун мечит жана 50гө чукул диний окуу жайлар аркылуу элибизге түшүндүрүү иштерин жүргүзүп келүүдөбүз», – деди Мухаммадсали ажы Рахмидинов.

Айта кетсек, аталган жыйынга координациялык кеңештин мүчөлөрү, райондук мамлекеттик администрация башчылары-акимдер, облустук жана райондук укук коргоо органдарынын башчылары, облустук жарандык коргоо кызматтарынын, райондук билим берүү, райондук баш имам-хатибдер, райондук ооруканалардын жана тиешелүү мекеме ишканалардын жетекчилери катышты.