Борбор калаадагы Башкы «Имам Сарахсий» мечитинде ордо калаадагы азанчыларды окутуу курсу кызуу уланууда. Кыргызстан мусулмандарынын Азирети Муфтийи Абдулазиз кары Закировдун тапшырмасына ылайык, азанды так, туура жана макам менен айтып үйрөтүүгө багытталган семинарда макамчы Нурболсун Адышов сабак өтүүдө.

«Башында имам-сопуларыбызда катачылыктар мол эле. Азыр окутуунун 2-жумасына келдик. Азан чакыруу бир топ жакшырды. Кудай буюрса, орозонун аягына чейин чоң жылыштар болот деп ишенебиз», – деди ал өз сөзүндө.

Айта кетсек, КМДБ жетекчиси буга чейин азанчыларды окутууга старт берип, азан чоң даават экенин, кооз жана уккулуктуу азан аркылуу ислам даңазаланып, кайырдин катмардын хидаятка келүү ыктымалдыгы жогору болорун, азанды жагымсыз жана ката айтуу жарандарды качырарын, ислам дүйнөсүндө сыбызгыган мукам азан аркылуу динге киргендер арбын экенин белгилеген болчу.