Ден соолукту чыңдоо ассоциациясы Республикалык ден соолукту чыңдоо жана массалык коммуникация борборунун колдоосу жана Кыргызстан мусулмандарынын Дин башкармалыгы менен биргеликте Жалал-Абад облусунун имамдары үчүн потенциалды жогорулатуу боюнча окутууларды улантууда.
Бул иш-чаралардын максаты – диний лидерлердин саламаттыкты сактоо маселелери боюнча маалымдуулугун жогорулатуу, коомчулукка так жана ишенимдүү маалымат берүүдө алардын ролун күчөтүү. Окутууларда вакцинанын маанилүүлүгү, жугуштуу оорулардын алдын алуу, ден соолукту чыңдоо жана жалган маалыматтарга каршы туруу боюнча актуалдуу темалар талкууланууда.
Имамдар коомчулуктун ишенимдүү лидерлери катары калк арасында туура маалыматты жайылтууда чоң роль ойнойт. Бул иш-чаралар алардын медицина жана коомдук саламаттык сактоо боюнча билимин тереңдетүүгө өбөлгө түзөт.
Окутуулар Жалал-Абад облусунун ар кайсы райондорунда улантылып, имамдардын активдүү катышуусу менен өтүүдө. Бул иш-аракеттер келечекте коомчулуктун саламаттыгын сактоо жана чыңдоо боюнча биргелешкен иштерди күчөтүүгө шарт түзөт.