Ысык-Көл облусунун Балыкчы шаарында курула турган «Абдулла шейх» атындагы жаңы мечиттин курулушуна капсула салынды. Салтанаттуу иш-чарага Кыргызстан мусулмандарынын Азирети Муфтийи Абдулазиз кары Закиров, Кыргызстан мусулмандарынын Аалымдар Кеңешинин төрагасы Замир кары Ракиев, Ысык-Көл облусунун казысы Самидин кары Атабаев, мэр, шаардык депутаттар, шаардын баш имам-хатиби жана жергиликтүү тургундар катышты.

Жаңы мечит өз өмүрүн дин ишине арнаган Абдулла шейхтин урматына аталган. Анын курулушу Балыкчы шаарынын тургундарынын демилгеси менен ашар жолу аркылуу башталды. Жергиликтүү эл курулушка өз мүмкүнчүлүгүнө жараша салым кошууда. Алсак, бирөө фундаментин, экинчиси дубалын тургузуп, дагы бирөө ички жасалгасын жасап, курулушка колдоо көрсөтүүдө.

Иш-чара Куран окуу жана гимн менен башталып, салтанат менен коштолду. Азирети Муфтий жергиликтүү элге ыраазычылыгын билдирип, ийгилик каалап, батасын берди. Ошондой эле, Балыкчы шаарынын мэрине КМДБнын Алкыш баракчасы жана атайын белеги тапшырылды.

Иш-чарадан соң делегация шаардагы борбордук мечитке зыярат жасады.