Ош облусуна караштуу Ноокат районунун баш имам-хатиби Бекназар ажы Жапаров райондогу Т. Кулатов, Төөлөс, Бел жана Көк-Жар айыл өкмөтүндөгү жетим-жесирлер үчүн кайрымдуулук катарында ооз ачар уюштурулгандыгын билдирди.

Аталган ооз ачарда жаш балдар үчүн оюн-зоок, жарыштар өткөрүлүп, оюнчуктар жана белектер тапшырылды. Ошондой эле, жалпы конокторго кайрымдуулук катары акчалай сыйлыктар таратылды.

«Рамазан айында аткарылган ибадаттардын жана жакшылык иштердин сообу эселеп берилет. Өзгөчө аз камсыз болгон үй-бүлөлөргө, жетим-жесирлер үчүн жүрүп жаткан кайрымдуулук иштери баарыбыздын көңүлүбүздү жибитүүдө. Хатибияттын демилгесин колдоого алып, демөөрчүлүк кылган Чыңгыз жана Мухтар агаларыбызга ыраазычылык билдиребиз. Буйруса элибиздин берешендиги менен кайрымдуулук иштери ар дайым уланат деп ишенебиз», – деди баш имам-хатиб Бекназар ажы Жапаров.

Ал эми иш-чараны уюштурууну баш имам-хатибдин орун басары Имамидин ажы Мамасадыков колго алып, буйруса алдыда дагы да көптөгөн кайрымдуулук иштерин өткөрүү планы бар экендигин кошумчалады.

Айта кетсек, аталган иш-чарага Көк-Жар, Т. Кулатов, Төөлөс жана Бел айыл өкмөтүнөн жалпысынан 150 адам катышты. Өткөрүлгөн кайрымдуулук иш-чарасынын жалпы суммасы 170 миң сомду түзгөн.