Бүгүн, 18-март күнү Башкы «Имам Сарахсий» мечитинде Ысык-Көл, Нарын, Талас, Чүй облустары жана Бишкек шаарындагы ДОЖ жетекчилерине багытталган жыйын өткөрүлдү. Аталган саамалык Азирети Муфтий Абдулазиз кары Закировдун өлкөдө ислам маданиятын өркүндөтүү жана КМДБны өнүктүрүүгө багытталган 40 кадамдан турган стратегиялык иш-мерчеминин алкагында муфтияттын диний билим берүүнү жакшыртуу иш-планын жана жаңы кабыл алынган Дин тутуу эркиндиги жөнүндөгү мыйзамынын максаттарын түшүндүрүү максатында уюштурулду.
Жыйынга Азирети Муфтийдин биринчи орун басары Самаган Мырзаибраимов, КР ДИМКнын экспертиза жана диний уюмдар менен кызматташуу бөлүмүнүн башчысы Айбек Иминов, КМДБнын диний билим берүү бөлүмүнүн башчысы Хамидулла ажы Садиллаев, КМДБнын референт жана жалпы бөлүмүнүн башчысы Абдиназар ажы Хаджибеков, диний билим берүү бөлүмүнүн кызматкерлери жана өлкөнүн түндүк аймагындагы жалпы 62 диний окуу жайдын жетекчилери катышты.
Жыйындын жүрүшүндө алгач КР дин тутуу эркиндиги боюнча мыйзамдагы диний билим берүүгө тиешелүү пункттары кенен түшүндүрүлдү. Андан соң Азирети Муфтийдин биринчи орун басары Самаган ажы Муфтияттын алдыга койгон иш-пландары менен тааныштырып, жаңы кабыл алынган мыйзамга ылайык, бирдиктүү окуу программасы, диний окуу жайлардын статусу, окуу китептери жана окутуучуларга коюлган квалификациялык талаптар туурасында түшүндүрдү. 1-орун басар ар бир тармак үчүн жумушчу топтор түзүлүп, бекитилген иш-мерчемдерге ылайык мугалимдерди окутуу апрель айында башталарын билдирди.
“Буюрса жакын арада медреселердеги иш кагаздарын жана окуу процесстерин электрондоштурабыз. Бекитилген комиссия ДОЖдордогу бирдиктүү окуу программаларын иштеп чыгышса, аны дагы сиздер менен талкууга кайра чыгарабыз”, – деп иштелип жаткан жоболорго да токтоло кетти Мырзаибраимов.
Жыйналыштын аягында мүдүрлөр өздөрүнүн суроолорун жана сунуштарын беришип, кабыл алынган мыйзам жана түзүлүп жаткан жоболор диний окуу жайлардын ишмерүүлүгүн өнүктүрүүгө жакшы кадам экенине ынанышып, күн тартибинде каралган маселелер боюнча кенен маалымат алышты.
Ушул эле жыйын эртең, 19-мартта өлкөнүн түштүк аймагындагы диний окуу жайлардын жетекчилерине уюштурулмакчы.
