Бүгүн, 19-март күнү Ысык-Көл облусунун Ак-Суу районунун Ак-Суу айылында Президенттин №54 жарлыгы, Кыргызстан мусулмандарынын Дин Башкармалыгынын №5 фатвасы жана учурдагы маанилүү маселелер боюнча жергиликтүү элге, мугалимдерге жана жаштарга кеңири түшүндүрүүгө багытталган жыйын болуп өттү.

Жыйындын жүрүшүндө катышуучуларга фатвалардын мазмуну, алардын коомго тийгизер пайдасы жана аткарылышы боюнча маалыматтар берилди. Ошондой эле коомдогу көйгөйлүү маселелер – суицид, зордук-зомбулук, үй-бүлөлүк ыдыроо, жаштар арасындагы терс көрүнүштөр, экстремизм жана терроризм тууралуу кеңири түшүндүрмө берилип, алардын алдын алуу жолдору талкууланды.

Иш-чарага КР Дин иштери боюнча мамлекеттик комиссиянын Ысык-Көл облусундагы өкүлү Асылбек Мамбетов, ИИМдин экстремизмге жана мыйзамсыз миграцияга каршы аракеттенүү кызматынын башчысы, милициянын полковниги Нурлан Килебаев, Ысык-Көл облусунун казысы Самидин кары Атабаев жана жергиликтүү бийлик өкүлдөрү катышты.

Жыйын соңунда катышуучулар өз суроолорун берип, пикирлерин айтышты. Айрыкча мындай түшүндүрүү иштери абдан керек экендигин белгилеп, ушул сыяктуу жолугушуулар мындан ары да өткөрүлсө деген сунуштарын беришти. Жыйын эл арасында жакшы маанай жаратып, пайдалуу пикир алышуу менен жыйынтыкталды.