Бүгүн, 20-мартта Ысык-Көл облусунун Түп районунда жыйынтыктоочу түшүндүрүү жыйыны өтүп, ушуну менен облус боюнча бардык район-шаарларда иш-чара ийгиликтүү аяктады.
Жыйындын негизги максаты – Президенттин №54 жарлыгын, Кыргызстан мусулмандарынын Дин башкармалыгынын №5 фатвасын элге туура жеткирүү, ошондой эле суицид, зордук-зомбулук, экстремизм, терроризмдин алдын алуу жана үй-бүлө тарбиясы тууралуу кенен маалымат берүү болду.
Иш-чарага Дин иштери боюнча мамлекеттик комиссиянын Ысык-Көл облусундагы өкүлү Асылбек Мамбетов, ИИМдин экстремизмге жана мыйзамсыз миграцияга каршы аракеттенүү кызматынын башчысы, милициянын полковниги Нурлан Килебаев, Ысык-Көл облусунун казысы Самидин кары Атабаев жана жергиликтүү бийлик өкүлдөрү катышты.
Түп районунун акими баштаган жергиликтүү бийлик өкүлдөрү, айылдык депутаттар, айыл башчылар, имамдар жана мугалимдер да катышкан иш-чара суроо-жооп менен коштолду. Жыйын соңунда катышуучулар пикирлерин жана сунуштарын билдиришти.
Белгилей кетсек, мындай иш-чаралар буга чейин облустун бардык район-шаарларында өтүп, бүгүн Түп району менен жыйынтыкталды. Иш-чаранын негизги максаты элдин маалымдуулугун арттыруу жана коомдогу терс көрүнүштөрдү алдын алуу болуп саналат.
