Жалал-Абад облусундагы Аксы районунун имамдарына “Дин тутуу эркиндиги жана диний бирикмелер жөнүндө” мыйзамы боюнча атайын жыйын болуп өттү.
Иш-чара райондук мамлекеттик администрациянын жыйындар залында болуп, ага Жалал-Абад облусунун мусулмандар казысынын орун басары Арпидин ажы Жороев, КРнын Дин иштери боюнча мамлекеттик комиссиясынын (ДИМК) Жалал-Абад облусундагы өкүлү Нурбек Кайсарбаев, Аксы районунун мамлекеттик администрациясынын аппарат жетекчиси Мирлан Сагынбаев жана райондун аймагындагы мечит имамдары катышты.
Жыйында Арпидин ажы Жороев салтуу ислам түшүнүгү, акыйда маселеси боюнча кыскача түшүндүрмө берсе, ДИМКнын Жалал-Абад облусундагы өкүлү Нурбек Кайсарбаев жаңы кабыл алынган “Дин тутуу эркиндиги жана диний бирикмелер жөнүндө” мыйзамы боюнча атайын слайд аркылуу кеңири түшүндүрмө берди.
Эске салсак, Аксы районунда жалпы 83 мечит болсо, алардын 30унда жума намаз окулат. Жыйынга катышкан жума мечит имамдары даават тартиби, мектеп окуучуларынын жума намазга барышы өңдүү маселелер боюнча суроолорду беришип, жоопторду алышты.