Талас облусунун Бакай-Ата районуна караштуу Өзгөрүш айылындагы “Зыйнат апа” мечитинде сооптуу иш-чара болуп өттү. Айыл тургундары көп жылдан бери элдин кызматында ак дилден эмгектенип, талыкпай кызмат өтөп келе жаткан айыл имамы Кадыркул Чоткараевге терең сый-урмат көрсөтүп, ага өзгөчө белек катары ыйык Мекке-Медина шаарларына жолдомо ыйгарышты.

Умрага жөнөтүү иш-чарасы айыл элинин өз имамына болгон терең ыраазычылыгын жана анын эмгегин жогору баалаганын айгинелеп турат.

Ошол эле күнү демөөрчүлөрдүн колдоосу менен “Зыйнат апа” мечитинде аялдар үчүн намазкана, имамдын бөлмөсү, 100 орундуу конок залы жана очоккана курулуп, пайдаланууга берилди. Бул жаңы имараттар мечит жамааты үчүн ыңгайлуу шарттарды түзүлүп, диний ишмердүүлүктүн өнүгүшүнө чоң салым кошмокчу.

Хатибияттан билдиришинче, Кадыркул Чоткараев Өзгөрүш айылынын тургундарына диний кызмат кылып, алардын руханий агартуусуна, адеп-ахлактык баалуулуктарды жайылтууга, мечиттин өнүгүшүнө чоң салым кошуп келет. Ошондой эле мечит айланасын көрктөндүрүү, кайрымдуулук иштерин уюштуруу сыяктуу маанилүү иштерди жүргүзөт.