Жалал-Абад облусунун Ала-Бука жана Чаткал райондорунун имамдары Ала-Бука райондук мамлекеттик администрациясынын жыйындар залына чогулду. Анда имамдарга жаңы кабыл алынган “Дин тутуу эркиндиги жана диний бирикмелер жөнүндө” мыйзамы боюнча түшүндүрмө берилди.
Жыйынга Жалал-Абад облусунун мусулмандар казысынын орун басары Арпидин ажы Жороев, КРнын Дин иштери боюнча мамлекеттик комиссиясынын (ДИМК) Жалал-Абад облусундагы өкүлү Нурбек Кайсарбаев, Ала-Бука райондук мамлекеттик администрация башчысы, акимдин орун басары Жанарбек Токтогулов, Ала-Бука жана Чаткал райондорунун баш имам-хатибдери Шумкарбек ажы Чыналиев жана Кубанычбек ажы Токонов, райондук улуттук коопсуздук кызматынан, райондук ички иштер бөлүмүнөн, район аймагындагы айыл башчылар, аялдар комитетинин мүчөлөрү жана мечит имамдары катышты.
Жыйын суроо-жооп менен уланып, соңунда жыйында айтылган маселелер боюнча элге, мечит жамаатына туура, так маалымат жеткирүү тапшырмасы берилди.
Кошумча маалымат, Ала-Бука районунда жалпы мечиттердин саны 73, мындан 21 жума намаз окулуучу мечиттер. Ал эми, Чаткал районунда 21 мечит болсо, 11 мечитте жума окулат.