Ош облустук казыятында жылды жыйынтыктоочу жыйын болуп өттү. Ага Сайдамир ажы баштаган казыят кызматкерлери, баш имам-хатибдер жана жыл ичинде активдүү иш алып барган жооптуу имамдар катышты.

Жыйындын жүрүшүндө жети райондун баш имам-хатибдеринин жыл ичинде аткарган иштери, анын ичинде мечиттердин эсептик каттоосу, КР Президентинин №54 жарлыгы жана КМДБнын №01 фатвасы, КР өкмөтүнүн экстремизм жана терроризмге каршы аракеттенүү боюнча диний тармакка байланыштуу пункттарынын аткарылышынын алкагында жүргүзүлгөн иш-чаралар, мечиттердин мүлктөрүн каттоо жана салафизмдин алдын алуу иштери туурасында жылдык отчёттук маалыматтар угулуп, баш имам-хатибдердин ишмердүүлүгүнө баа берилди.

Мечиттердин каттоосу боюнча облустук казыяттын үгүт-насаат жана мечиттер адиси Абдималик ажы Турсунбеков төмөнкүлөргө токтолду:

«Жыл башынан бери облус боюнча жалпы 116 мечитти документтештирип, мамлекеттик эсептик каттоодон өткөрүп, 7 мечиттин документин кайра каттоосу менен бирге жалпы 123 мечиттин каттоо иштери бүттү. Бул жылы мечиттерди эсептик каттоодон өткөрүү боюнча алгылыктуу иштер болду. Албетте бул иштерде баш имам-хатибдердин жана алардын жардамчыларынын эмгеги чоң. Ошондой эле казыят кызматкерлери, райондук баш имам-хатибдер, каттоодон өтпөгөн мечиттердин имамдары жана райондун акимдери менен бирге жер-жерлерде жыйын өткөрүп, түшүндүрүү иштеринин негизинде ушундай жакшы жыйынтык болду”.

Ал эми облус казысы Сайдамир ажы Жейналиев баш имам-хатибдерге кызматтын аманат экенин эскертип, «Ар бир кылган кызматыбыз жалгыз гана Алланын ыраазычылыгы үчүн болуусу керек. Жыл башынан бери канчалаган иш-чараларды уюштуруп, элдин биримдиги, ынтымагы үчүн кызмат өтөдүңүздөр. Ушунуңуздардан жазбай, дагы да үлгүлүү иштерди жасай бериңиздер», – деп билдирди.