Кыргызстандан ажылык амалдарын аткаруу үчүн Саудия Араб Падышалыгынын Жидда шаарына конгон зыяратчыларды тосуп алуу жана мейманканаларга жайгаштыруу иштери кызуу жүрүүдө. Бул боюнча 2024-жылдагы ажылыкты уюштуруу штабынын өкүлү Кызырбек ажы Жээнбеков билдирди.
«Бүгүн Ош шаарынан Жиддага 2-топ келип конду. Ажыларыбыздын маанайлары жакшы. Алла Таала ажылыкты бекем ниет кылып, пайгамбарыбыздын изи калган жерге келген ажыларыбыздын ибадаттарын кабылдасын», – деди ал.
Ал эми КМДБнын ажылык-умра жана эл аралык байланыштар бөлүмүнүн адиси Эсенали ажы Убайдуллаев ажыларды аэропорттон тосуп алып, Мекке шаарына жайгаштыруу УРШ тарабынан колго алынып, ажылардын тамак-ашы өз убагында берилип жатканын айтып, Кыргызстандан барган зыяратчылар үчүн «Вакф аль-Авваам» фонду 2 фура минералдык суу белек кылганын билдирди.
